المعالجة المحاسبية للضمانات ...IFRS15

المعالجة المحاسبية للضمانات ...
شوف يعم الحج معيار الايرادات ifrs15 بقولك ايه قول انت بقي 😊 ... هناك نوعين من الضمانات المتعلقة ببيع منتج سواء كان سلعة او خدمة .. ايه هما يعم الحج مش عارف 😂 نقولهم عشان الحبايب
1- ضمانات تعتبر ضمن سعر البيع
2- ضمانات لا تعتبر ضمن سعر البيع

طب ما توضح يعم الحج عشان الامور تظبط بص يا زميل
1- ضمانات تعتبر ضمن سعر البيع : تضمن للعميل ان المنتج يلبي المواصفات المتفق عليها وليس للعميل خيار شراء الضمان بشكل منفصل وفى هذه الحالة لا تعتبر الضمانات خدمة مستقلة ويتم تطبيق معيار المحاسبة الدولي 37 المخصصات والالتزانات والاصول المحتملة بحيث يتم تكوين مخصص ضمان للمنتجات المباعة
تمام ياعم الحج فله يا زعيم طيب الضمان الثانى تابع
2- ضمانات لا تعتبر ضمن سعر البيع : وهى ضمانات تقدم خدمة الصيانة بالاضافة الى ضمان تلبية المنتج للمواصفات المتفق عليها ويكون متاح للعميل خيار شراء الضمان بشكل منفصل عن المنتج وفى هذه الحالة تعتبر الضمانات خدمة مستقلة وعلى المنشاة محاسبة الضمان الموعود به كالتزام اداء

انت بتقول اية 🤔 معنتش فاهم حاجة طيب بص يعم الحج نقول مثال عملي يفنش الموضوع يا ريت يا زميلي

مثال عملي على الضمانات
---------------------------
خلال عام 2017 باعت شركة الصباح 100 جهاز لاب توب للعملاء بسعر اجمالى 800000 $ (نمشيها دولار لان الجنية بعافيه ) وتكلفتها 500000 $ يا جامد (300 الف ياد ربح فى سنة شكلها هتلعب معاك) وهى مكفولة بضمان لمدة عامين من عيوب التصنيع تقدر الشركة المصاريف المتوقع دفعها خلال فترة الضمان مبلغ 15000$ (صاحب الشركة صحبي وكفاءة عملنا دراسة من واقع التجارب السابقة والبيانات التاريخية وصلنا من خلالها ان العيوب بسيطة وان التكلفة المتوقعة كاقصى حد تقدر ب 15000) وفى نفس الوقت باعت شركة الصباح ضمانات اضافية لصيانة 40 جهاز لاب توب لمدة 3 سنوات بعد العامين الواردين فى الضمان السابق بناء على طلب بعض العملاء مقابل 12000 $ (يعني بعض العملاء عندهم ضمان 2 سنة مع الجهاز قالوا احنا عاوزين كمان 3 سنوات ضمان زيادة وبندفع ثمن الضمان قولنا ماشي رزق وجه لنا نقوله لا )

القيود فى عام 2017
قيمة ال 100 جهاز لاب توب
قيد البيع
800000 من حـــ/ النقدية
800000 الى حــــــــــــــــــ/ المبيعات
قيد التكلفة
500000 من حــــ/ تكلفة البضاعة المباعة
500000 الى حـــــــــــــــــــــــــــــــــــــــــ/ المخزون
قيد تقدير المخصص ب 15000 المتوقع صرفها على صيانة الاجهزة خلال العامين فترة الضمان التى تعتبر ضمن سعر البيع

15000 من حــــ/ مصروف الضمانات
15000 الى حـــــــــــــــ/ مخصص الضمات - لاب توب

فى اى وقت بعد البيع حتى نهاية العامين عندما ياتى جهاز للصيانة
بصرف من المخصص
من حـــ/ المخصص
الى حــــ/ اجور ورواتب او المخزون والخ

قيد بيع الضمانات المستقلة المباعة لبعض العملاء لمدة 3 سنوات بعد مرور السنتين من الضمانات السابقة

12000 من حـــ/ النقدية
12000 الى حــــ/ ايرادات مؤجلة (غير مكتسبة او محصلة مقدما ) صيانة لاب توب
بعد انتهاء السنتين الاولين للضمان يتم الاعتراف بعدها بايراد كل سنة من الثلاث سنوات ب 12/3 ب 4000 $ سنويا

4000 من حـــ /يرادات مؤجلة (غير مكتسبة او محصلة مقدما ) صيانة لاب توب
4000 حـــ/ ايرادات صيانة

واذا العملاء قدموا الاجهزة للصيانة فى تلك الفترة نسجل عادى مصروف

من حـــ/ مصروف الصيانة الخاص بالضمان
الى ح المخزون او الاجور او الى اى جهة قدمت الصيانة

اتمنى ان يكون الموضوع بسيط وسهل ومفهوم
حقوق النشر محفوظة 😍😍